तारा झार्ने जुनुन ?

दिनको घाम कि रातको जुन लिएर आऊ ?
कि चिसा तारा झार्ने जुनुन लिएर आऊ ?

यो कलिमा, आफ्नु सामान आफै किन्नु पर्ने
अब भन, म कति चानचुन लिएर आऊ ?

खुकुरी होइन, ब्लेड हो – दुबैतिर काट्छ
काटेसी, मलम पट्टी कि नुन लिएर आऊ ?

नगरले नभएसी, न्यायपालिकामै जाउँला
केही सल्लाह छ कि, कुन कानुन लिएर आऊ ?

बाले सन्चयकोष झिकेर माटो किनेका हुन्
माटो माथि छाउन आमाको सुन लिएर आऊ ?

कुनै दाग लुगामा, साह्रै जिद्दी हुँदा रहेछन्
धुलाउन कुन सरफ कि साबुन लिएर आऊ ?

ज्योति अनिश्चित
२०८१-फाल्गुण २८